Thursday, May 25, 2006

اشراقة جديدة

و مع اشراقة شمس يوم 26/5
اشرق نور اول يوم فى السنة الثانية لمدونتى

Friday, May 19, 2006

جرعة تفاؤل

اهداء لكل المتشائمين و كل اللى عندهم امتحانات
اهداء خاص لانسانة
الوصفة السحرية لعصير التفاؤل


و مع الاحداث اللى بنعيشها و بنشوفها كل يوم و اقتراب موسم الامتحانات , فكرت فى صنع عصير للتفاؤل لعله ينفع

:المقادير

مقدار 3 دقايق من استنشاق الهواء بعمق فى البلكونة ( يفضل هواء نقى بدون عادم ) و الاحساس بالشهيق و الزفير , اخلي الهواء يغسلنى , كل نفس يدخل ياخد حبه هموم و يطلعهم مع خروجه

- لوكنت وقت الغروب , 5 دقايق من التأمل فى الشمس و هى بتختفى و بتغيب شوية شوية عن نظرك لحد ما تختفى خالص و ساعتها فكر انها اختفت عن نظرك و لكن اشعتها لسة موجودة و بتنور الدنيا و اوعى تنسى انها هتجيلك بكرة تصبح عليك

لو كنت فى الليل , 5 دقايق تفكير فى القمر ( لو ليلة قمريه ) او فى النجوم ( لو ليلة مش قمريه ) و فكر ازاى رغم انه جسم غير مضىء بطبعه الا انه بينقل النور

بضع حبيبات التفكير فى الناس اللى بيحبوك و اللى بيتمنولك دايماً الخير و ازاى هيكونوا زعلانين لو شافوك فى الحالة ديه

نصف كوب ممتلىء بافكار حول اللى خلقك و قد ايه هو عارف اللى انت فيه و انه اكيد مش هيسيبك لانه بيحبك

قطع صغيرة مبشورة من التأملات حول همومك و ازاى تستقبلها بفرح مهما كانت شديدة لانك عارف انها فترة و هتمر و اكيد هتخرج منها اقوى و اشد من الاول

مقدار فنجان من احساس التحدى لكل همومك , تحدى او رهان لا يقبل القسمة على اتنين او الحلول الوسط , اما اكسبه او اكسبه , وخلى ايمانك بربنا هيزيدك عزيمة و اصرار

- مقدار ملعقة ممتلئة عن اخرها من النظرة الايجابية للامور

- الوردة : ممكن تبص لجمالها و ممكن تبص لاشواكها

- لو شايف الدنيا سوداء قدامك , حاول تدقق بنظرك فى السواد اكيد هتلاحظ نقط بيضاء صغيرة بتكبر و تزيد كلما دققت النظر اكتر

مقدار ذرة من شىء يبدو صغير و لكنه فعال ..... الابتسامة

طريقة التحضير

اضف كل المكونات السابقة فى عقلك و استمر فى التأمل فيها اثناء التقليب حتى تختمر كل الافكار ثم يرش عليها بضع ذرات الابتسام و تقدم باردة

ملحوظة

الوصفة غير صالحة للتخزين , بل يجب عليك تحضيرها كل مرة تحتاج اليها فيها

مفعول الوصفة يعتمد عليك و على مدى استعدادك لتقبلها


لا تنس الابتسامـــــــة

Thursday, May 18, 2006

قريباً

على موعد مع تدوينة جديدة بأسم
" جرعة تفاؤل "
قريباً جداً باذن الله

Tuesday, May 02, 2006

روبابيكيا




بياع روبابيكيا
و داير فى الشوارع
شايل و محمل كتير بضايع
يلف فى الحوارى
يقول انا شارى
مين فيكوا بايع ؟؟

يشترى الانسان
بارخص الاتمان
اصله مالوش لزمة
و وجوده عامل ازمة
طول ما هو عايش بيخرب
ال ايه بيتعلم و يجرب
يحرق .. يقتل و يدمر
مين له حق يتذمر
يشوه , يشرد و ينسف
و يرجع يبكى و يتأسف
يتوب على اللى عمله و يندم
و فى ثانيه يرجع يعذب
و يعدم

يشترى الوشوش
بشويه فكة و قروش
اكمننا عايشين فى غش
و الواحد له الف وش
وشوش تحترف الالاعيب
و وشوش ماتعرفش العيب
وشوش كتير حزينة
و غيرها البشوش
وشوش .......ـ
لكن تخبى كتير و تحوش
مرة تخبى وراها انسان
و كتير تخبـــى
وحــــوش


يشترى الاحساس
اللى بيستغنى عنه الناس
يشترى احساسهم بالرحمة
كأنه عار او تهمة
يشترى الطباع
و اوقات الضياع
يشترى القلوب
يشترى العيوب
....يشترى الضماير
يشترى ذكرياتهم
و اى لحظة الم فى حياتهم
يشترى ايام طفولتهم
ايام كان هو ولد
بتنط من عينيه الشقاوة
و هى.... بنوته حلوة بضفاير
ملحوظة
لما اخترت اسم روبابيكيا , كنت حاسس انى شفت الاسم ده قبل كده و لكن ماكنتش فاكر فين و نسيت خالص انه اسم مدونة انتوك و انتيكة و احب اقول انه لا يوجد اى علاقة بين اسم التدوينة و اسم مدونتهم التى اعتز بتصفحها و لكنه مجرد تشابه اسماء لا غير

Monday, May 01, 2006

ايضاح

مجرد ايضاح
سعدت كثيراً بصدور مدونة جديدة م}خراً منذ ما يقرب من شهرين اسمها :ـ
www.ens-san.blogspot.com
و الطريف ان صاحب المدونة اختار لنفسه اسماً قريب الى حد ما من اسمى و هو
ens-san
علماً بان اسمى منذ ان بدأت التدوين لم يتغير و لن يتغير ان شاء الله و هو
ensan
مش زعلان ابداً من اختياره لاسم قريب من اسمى , و لكن كان لازم اوضح الفرق بين الاسمين تفادياً لحدوت اى التباسات او سوء فهم
و شكراً

Free Counter
Free Counter