انسان بيحس: 09/01/2007

Sunday, September 30, 2007

اوكازيون

من وحى شعار اغصان الكرمة لسنة 2007/2008 ( 2)ـ

اوكازيون

تخفيضات .. تنزيلات .. اوكازيون
بضايع على كل شكل و لون
تعالى قلب فى المعروض
عندنا احلى العروض
تعالى و طلبك هتلقه
تعالى ما هى مش فارقة
داين كنت او مديون

سلع كتير و بضايع
معروضة فى الفتارين
مرمية فى الشوارع
بتنادى المشترين
بس على مين ؟
ده لا يمكن و لا يكون
هو انا مجنون
ومهما احلف ميت يمين
برضة يغلبنى الحنين
و اقول ده هيه بصة
مجرد نظرة ع الرصة
و اقف و احتار
بين ام ضفاير و ام اوصه
و فى الاخر اسيب الاتنين
و امشى اتفرج ع الفتارين
ترنجات.. قمصان.. فساتين
و لعب اطفال .. عمال على بطال
زمارة .. عروسة ..و بلالين
هندى .. يابانى .. و من الصين

اعلانات.. اعلانات.. اعلانات
مطلوب انسات
عاوزين كمان جليس
و مايضرش لو عريس
طب من اى طبقة ؟؟
و لا ابن ذوات ؟؟
و اخيراً قسم الاحاسيس
صدق .. نفاق .. كراهية
كذب .. امانة .. صحوبية
حاجات تمنها رخيص
و غيرها غالية شوية
و يا ترى ديه من المغشوشة و لا الاصلية ؟؟
اسأل الناس حواليا
و يردوا " مش عارفين "ـ
طب اسأل مين ؟؟
اسأل البايع ؟؟
ما هو زيى ضايع
بين الوف البضايع
فى العلب مدارية

و افضل فى سوق الحياة
واحد من المشاة
تايه فى الشوارع
محوطانى البضايع
معروضة قدامى السلع
اجى اشترى
اصاب بالحيرة
بالغيرة
و ساعات الهلع
محتاج افرق
محتاج ادقق
بين الاصلى و المغشوش
بين الحقيقى
او ع الوش منقوش

Saturday, September 29, 2007

تأمل

من وحى شعار اغصان الكرمة لسنه 2007/2008

ما اوسع سوق الحياة
حيث كل شىء مباح
كل شىء قابل للبيع و الشراء
بضائع....ـ
سلع استهلاكية و اخرى معمرة
قيم ...ـ
اخلاق ...ـ
قرارات ....ـ
علاقات ...ـ
اصدقاء ....ـ
و الدنيا اصبحت مزاد كبير
و الفائز من يدفع اكثر

الهى
كثيراً ما يبهرنى بريق الاشياء
اضل الطريق
فلا اعرف ما هو الحقيقى من الكاذب
احتار بين اللمعان الحقيقى
و الوميض الزائف
فكم من جوهرة ثمينة
دفنت فى التراب و فقدت بريقها
فاعتقدتها قطعة من الزجاج
و كم من قطعة زجاج
عكست ضوء الشمس
فاعتقدتها لؤلؤة