عصارة احاسيس (2)ـ
عصارة احاسيس (2)ـ
فيه ناس ممكن تحس بتأثيرهم فى حياتك بصورة مباشرة و بتحس ده فى ظل وجودهم جنبك او فى احتكاك معاك ,........ و فيه ناس ماتحسش اطلاقا باى اهمية ليهم فى حياتك لا فى وجودهم و لا فى غيابهم ....... و فيه ناس ماتحسش باهميتهم فى حياتك الا لما يختفوا منها ...... و لكن لو حسيت فجأة ان فى حياتك حاجة ناقصة ....... حاجة حصل فيها خلل بسيط يكاد يكون مش محسوس ,....... يمكن متخدش بالك منه ,...... حاول تفكر انه يمكن ده بسبب نوع رابع من الناس .......و هم الناس اللى بيكونوا ظاهريا ناس عادية معندهمش اى مواهب مميزة ....و لا شخصية وهمية ,...... ناس عاملة زى الملح اللى بيدوب فى الاكل و مابيكنش له وجود ظاهرى و لكن تأثيره فى الاكل كبير جدا ,..... الناس ديه عايشة حوالينا بس للاسف مابنحسش بيهم .....و ممكن يظهروا كتير و يختفوا فى حياتنا من غير ما نحس ......او نكتشف انهم بالروعة ديه ,...... و يمروا فى حياتنا مرور الكرام.... و فى وجودهم بنكون مقتنعين انهم ناس عادية و منحسش انهم عاملين اى فرق لانه غالبا ما بننساهم اصلا .... الناس دية ماتعرفش تظهر فى الزحمة ... الزحمة بتخنقها و بتمنع عنها الهوا .... بيبقوا زى الشمعة اللى مستحيل نورها يبان الا لو طفيت كل الانوار حواليها ....ناس متعرفش غير انها تلعب الدور التانى ورا البطل ..... فى حين ان هى البطل الحقيقى ..... ناس متعرفش تشتغل فى الضجة او الهيصة او الهتافات و الدعاية .....فى حين انهم اصحاب الافكار و الابتكارات اللى الناس بتعملها الهيصة ..... ناس تشتغل بس فى الخفى ..فى السكوت ....بعيد عن الناس ...ناس من اللى بيسموهم فى المسابقات الحصان الاسود او الجندى المجهول فى المعارك .... ناس مش محتاج ميكروسكوب عشان تشوفهم ....كل اللى محتاجه نظرة واعية للى حواليك علشان تلاقيهم .... ناس ممكن تلاقيهم فى موقف انسانى مبقاش حد يعمله ...او لفته حلوة بقت الناس تنساها .... او حاجة ابسط من كده زى ..كلمة صباح الخير .........ـ
فيه ناس بتحب تشيل الهم .. او بيكون قدرها انها تشيل الهم بدرى ...مش حب فى الهم بس عشان غيرها ميشلوش ..... و على الرغم من انهم بيبقوا عارفين ان ضريبة شيل الهم غالية اوى و مكلفة جدا ....سواء فى احلام بتتأخر او حتى بتتلغى خالص ...سواء فى تغيير اسلوب حياة بحاله .... سواء فى ضغط نفسى .. او حاجات تانية كتير ... بس بيكونوا راضيين , .. و الاكتر انهم بيكونوا متقبلين ده بفرح .. لانهم بيكونوا باصيين لبعيد .. للهدف الاكبر و هو راحة اللى حواليهم و انهم يعفوهم من الهم ... بيقدموا نفسهم فريسة علشان غيرهم مايحسش باى حاجة ... بيبقى الحزن بالنسبالهم او الهم اللى شايلينه مش الحاجة الحلوة اللى يشاركوها مع حد و بيفضلوا انهم يحتفظوا بيه لوحدهم و يعيشوا فى صراعه احسن الف مرة من انهم يشوفوا حد بيتألم معاهم .... بيبقوا محرومين حتى من قوله اه ايسط حقوق الانسان لما بيكون تعبان علشان اللى حواليه مايخدوش بالهم ... و يمكن كتمانهم للهم بيكون اصعب من الهم نفسه او من مواجتهم له .. يمكن بيكونوا فرحانين بشيلهم للهم لانه بيحقق جزء من شخصياتهم و هدفهم فى الحياة ... الهم بيكون الوقود اللازم لحياتهم بانتصارتهم عليه و انكساراتهم منه و هو نفس الهم اللى بيكون فى الاخر اللى بيدمرهم لما بيجيبوا اخرهم ...الظريف فى الموضوع انه فى الغالب الناس اللى حواليهم مابيكونوش حاسسين باى تعب او معاناة او صراع من اللى بيعيشها الناس ديه و كتير بيدوسوا و بيضغطوا قوى على جروحهم ... و بتوصل انهم بيحسوا مع الوقت ان ده واجب عليهم – اى الناس اللى بتشيل الهم - لازم يتعمل .... اما الناس اللى شايلة الهم فمقدمهاش الا انها يا اما تستسلم او تكمل المقاومة او تبدأ تشارك اللى حواليها بجزء بسيط و لكن فى كل الاحوال مابيوصلش لنتيجة ترضيه او تريحه ......ـ
posted by ensanbey7ess @ 10:41 AM
4 comments
