روبابيكيا
بياع روبابيكيا
و داير فى الشوارع
شايل و محمل كتير بضايع
يلف فى الحوارى
يقول انا شارى
مين فيكوا بايع ؟؟
يشترى الانسان
بارخص الاتمان
اصله مالوش لزمة
و وجوده عامل ازمة
طول ما هو عايش بيخرب
ال ايه بيتعلم و يجرب
يحرق .. يقتل و يدمر
مين له حق يتذمر
يشوه , يشرد و ينسف
و يرجع يبكى و يتأسف
يتوب على اللى عمله و يندم
و فى ثانيه يرجع يعذب
و يعدم
يشترى الوشوش
بشويه فكة و قروش
اكمننا عايشين فى غش
و الواحد له الف وش
وشوش تحترف الالاعيب
و وشوش ماتعرفش العيب
وشوش كتير حزينة
و غيرها البشوش
وشوش .......ـ
لكن تخبى كتير و تحوش
مرة تخبى وراها انسان
و كتير تخبـــى
وحــــوش
يشترى الاحساس
اللى بيستغنى عنه الناس
يشترى احساسهم بالرحمة
كأنه عار او تهمة
يشترى الطباع
و اوقات الضياع
يشترى القلوب
يشترى العيوب
....يشترى الضماير
يشترى ذكرياتهم
و اى لحظة الم فى حياتهم
يشترى ايام طفولتهم
ايام كان هو ولد
بتنط من عينيه الشقاوة
و هى.... بنوته حلوة بضفاير
ملحوظة
لما اخترت اسم روبابيكيا , كنت حاسس انى شفت الاسم ده قبل كده و لكن ماكنتش فاكر فين و نسيت خالص انه اسم مدونة انتوك و انتيكة و احب اقول انه لا يوجد اى علاقة بين اسم التدوينة و اسم مدونتهم التى اعتز بتصفحها و لكنه مجرد تشابه اسماء لا غير
posted by ensanbey7ess @ 11:37 PM
جميلة جداً ....احساس عالى قوى
:)
جامدة فعلا ماتطلعش فعلا إلا من إنسان بيحس
من أقوى تدويناتك
الى جولى
اتمنى ان الابتسامة ديه تكون علامة عن الرضا
الى احمد
متشكر با بوحميد , بس اعتقد انها فلتة و مش هتكرر تانى
You have an outstanding good and well structured site. I enjoyed browsing through it residential interior designers columbus ohio
هههههههههههه
سبحان الله
هتصدقني لو قلت لك اني كتبت قصة عن الروبابكيا يعني حاجة قريبة من دي شوية
برضه عن واحدة بتبيع ذكريات طفولتها لبتاع الروبابكيا
بس دي مش هاقدر ابعتها لك دلوقتي عشان انا مش راضية عنها
يعني عايزة اعدل حاجات فيها وفي الالفاظ اللي انا كتباها بيها
حلوة القافية في اخر كل بيت
الجزء المفضل عندي
بياع روبابيكيا
و داير فى الشوارع
شايل و محمل كتير بضايع
يلف فى الحوارى
يقول انا شارى
مين فيكوا بايع ؟؟
مي
واضح ان فيه توافق فكرى
عموماً خلصى قصيدك و ابعتيهالى