اللى نعرفه احسن من اللى مانعرفوش
اللى نعرفه احسن من اللى مانعرفوش
و مع اقتراب فترة الانتخابات بدأت الحظ بعض التغييرات اللى بتحصل فى الدنيا حواليا و بسرعة بداية من علم مصر الذى يرفرف فى الجزء السلفى من جميع قنواتنا الارضية العظيمة و مرورا بالاخبارالمتتالية عن السيد الرئيس و جولاته المتعددة لتدعيم حملتة الانتخابية و اعلانات الحزب الوطنى التى لا تنتهى فى تأييد مرشحها و اخيرا بدأت الحظ امتلاء معظم الشوارع الرئيسية و انصاف الرئيسية بلافتات تؤيد السيد الرئيس و اخرى تقول " لا للمهاترين و المزايدين على الوطن " و فكرونى بالجملة الشهيرة اللى كنا نرددها فى معسكرتنا لما نمر على وحدة عسكرية او ما شابه ساعتها كنا كلنا نردد :" حسنى مبارك راجل ذوق خلى المترو تحت و فوق " , كل ده جميل و لكن لما نيجى نفكر بتأنى نجد ان اكتر شريحة متأثرة من ده كلة هى الفئة البسيطة من الشعب اللى معندهاش اى فكر سياسي محدد و لكن بيمشوا مع التيار و للاسف الفئة ديه كبيرة.ـ
المشكلة هنا هى هل الانتخابات هتقدر تغير فكر الناس دول ؟؟
الفئة ديه بتعترف بالمثل القائل "اللى نعرفه احسن من اللى مانعرفوش " و من المنطلق ده هم اكيد هينتخبوا الريس لانهم عارفينه و مايعرفوش غيره و غير كده الناس دول زى بقية الشعب المصرى هم ناس عاطفيين بمعنى انهم بيرتبطوا بالشخص اللى بيعرفوه و لا تهون عليهم عشرته .......ـ
سمعت من عامل فى مصنع اثناء التدريب بيقولى الجملة دى" لازم كلكم تنتخبوا الريس لانه الاب "......ـ
مش عاوز حد يفهم انى اعارض الريس فقط للمعارضة بالعكس انا مقتنع ان الريس اضاف للبلد و لكن انا عاوز الناس تغير فكرها من " اللى نعرفه احسن من اللى مانعرفوش " الى " اللى مانعرفوش يمكن يكون احسن من اللى عارفينه" و اظن انها حاجة محتاجة سنين و سنين
عموما الايام الجاية هتوضح الى اى مدى فكر المجتمع استجاب للتغيير و ربنا يسهل
posted by ensanbey7ess @ 12:40 AM
