Monday, June 27, 2005

حياة


حـيــــــــاة

كان حلمه بسيط
لا كان مال و لا جاه
و لا غنى او حتى صيت
كان حلمه على قده
ابدا مش كتير
حلم صغير
عمره ما كان كبير
كان بيحلم بحاجة واحدة
حاجه واحدة
....انه يطير

يطير و يعلى فوق كل البشر
ينسى العالم بكل ما فيه
ينسى اهله و كل ماضيه
كان نفسه يعلى فوق السحاب
عن الغيوم و عن الضباب
.....كان نفسه يوصل للقمر
كان زى الطيور يحلق يحوم
كان نفسه يلالى زى النجوم
كان لسه ابيض
قلبه صافى
و حضنه دافى
ميعرفش الهموم

و مرت سنين كتير و ايام
و ابتدت معالم دنياه تظهر
....و تبان
عرف الالم
عاش و اتظلم
....حس الندم
و ضمير الناس اللى انعدم
حس بقسوة قلوبهم
حس بكل عيوبهم
حتى فى عناقهم
حس بنفاقهم
حس انه بيتهان

فصرخ باعلى صوت
صرخ اخيرا
بعد طول سكوت
صرخ باعلى حسه
"صرخ فى الناس "حسوا
صرخ و ماستناش الرد
عارف انه ماسمعهوش حد
و لكنه حاول من جديد
حاول بصوت اعلى
و عزم شديد
"قال " يا عالم يا هوه
اسمعوا كلامى و بعدين انسوه
"و الناس تقول " ده مجنون ارجموه
"و اللى يقول " لا هاتوه
و صوت من بعيد
"بقول " بلاش تقتلوه
و بعد الضرب و الاهانه
جنب الحيط و رموه

حاول يصرخ من جديد
اصله طول عمره عنيد
حاول ينهض و يقوم
حاول يتغلب على
.....تعبه والهموم
......................
.................
ملحوظه :
حاولت كتير اكمل باقى القصيده لانها مستحيل تخلص كده و اكيد لها بقيه و اكنى اكتشفت انى مستحيل اكملها دلوقتى لانى معرفش المستقبل بمعنى تانى ان البطل هنا واقف عند النقطه ديه و مازالت التجربه مستمرة و هو مازال بيعيشها اى انه مازال بيحاول ينهض و يقوم و يتغلب على المصاعب و يحقق امله ......


1 تعليقات:

At 5:16 PM, Blogger albara2a alsharesa said...

هاي يا مينا بجد بجد من غير مجامله كلامك يجنن انا ماكنتش متخيلاك كده خالص انت فعلان انسان بيحس و دي حاجه مش عند اي حد كلامك بيعبر عن ناس كتيير و اولهم انا كل واحد و حكايته بس المضمون واحد اتمني ليك انك تكون سعيد و تفضل حساس كده لان الاحساس او ان يبقي عندك احساس ده كنز و معناه انك عايش0

ساره

 

Post a Comment

<< Home

Free Counter
Free Counter